Circuitu de narración oral

Blanca y l’arcu la vieya ye un cuentu que nos fala de colorinos, de xente de lo más variao. Dexar de ver la vida en blanco y negro ye perimportante. Blanca y l’arcu la vieya cúntanos la historia d’un personaxe al que namás-y prestaba’l color blanco. Tenía toles coses d’esi color. Prestáben-y la ñeve, les nubes, la fariña, les canes… nun tenía querencia nenguna polos demás colores. Un día de Navidá, Blanca atópase al llegar a casa con un arbolón de color verde na sala. Ye tan grande’l disgustu, qu’escapa galmiando y berrando lo más lloñe posible de la so casa. Nesta aventura, ye onde atopa l’arcu la vieya, y xuntos entamen un viaxe al traviés de los colores que Blanca nun va escaecer enxamás. “Blanca y l’arcu la vieya” ye un espectáculu musical, la historia cúntase al traviés de cantares prestosos pa que los neños puedan caltener una participación dafechu.