Circuitu d’artes escéniques

De les parees del Muséu del Prado cuelga una pintura bien llamativa onde apaez representada la cabeza d’un lleón; al par d’ésta apaez escrito con unes lletrones el nome d’una muyer, Rosa Bonheur.

La historia de superación d’una muyer que foi quién a ser artista, nun tiempu nel qu’a les muyeres nun les dexaben acceder a los estudios académicos, que vistió pantalones, anque esto taba prohibío por llei, y que decidió pintar animales monteses cuando la sociedá del so tiempu nun vía con bonos güeyos que les muyeres pintaren otra cosa que nun foren flores o escenes de la vida íntima.

Dende la Francia del sieglu XIX, la gran Rosa Bonheur cunta la so historia a los neños y neñes del nuestru tiempu pa que seyan conscientes de les dificultaes a les que tuvieron qu’enfrentarse muyeres, como ella, qu’acabó convirtiéndose nuna de les artistes más grandes del so tiempu.